ავტორების სია » გრიგოლ აბაშიძე

გრიგოლ გრიგოლის ძე აბაშიძე (დაბ. 19 ივლისი /1 აგვისტო, 1914, სოფ. ზედა რგანი, ჭიათურის რაიონი - გარდ. 29 ივლისი, 1994, თბილისი), ქართველი პოეტი და პროზაიკოსი.

გრიგოლ აბაშიძე დაამთავრა თსუ-ის ფილოლოგიის ფაკულტეტი (1936). იყო ჟურნალების "ნიანგის", "დროშისა" და "მნათობის" რედაქტორი. 1967 წელს გახდა საქართველოს მწერალთა კავშირის პირველი მდივანი, ხოლო 1973 წელს - თავმჯდომარე.  პირველი კრებული გამოსცა 1938 წელს. მისი შემოქმედება ჟანრობრივად მრავალფეროვანია. ავტორია ისტორიული და თანამედროვე თემაზე დაწერილი მრავალი ლექსისა, ლექსთა ციკლებისა: "სამხრეთის საზღვარზე" (1949), "ლენინი სამგორში" (1950, ორივე ციკლისთვის მიენიჭა სახელმწიფო პრემია, 1951), "თუნდ დავიარო მთელი სამყარო" (1959), რომლებშიც მოქალაქეობრივი პოეზიის პათოსი დაკავშირებულია სამყაროს ლირიკულ და რომანტიკულ აღქმასთან.
გრ. აბაშიძის ლირიკული ლექსების თემაა თავგანწირული ბრძოლა სამამულო ომის წლებში ("მტრები", 1941; "გაზაფხული", 1945; "მას დიდება", 1944; "ძლევამოსილი", 1945). აბაშიძის შემოქმედებაში ახალი სახით და ახალი ეპოქის შესატყვისად აღდგა ტრადიცია კლასიკური პოემისა მკაფიოდ ჩამოყალიბებული სიუჟეტით და გამოკვეთილი ხასიათებით ("გიორგი VI", 1942; "ძლევის ქედი", 1943; "ზარზმის ზმანება", 1946; "ციხის ლეგენდა"). საქართველოს წარსულს ეხება გრ. აბაშიძის ისტორიული რომანები "ლაშარელა" (1957), "დიდი ღამე" (1963). ამ თხზულებებში ასახულია XII-XIII საუკუნეების მიჯნაზე ქართველი ხალხის მიერ გადატანილი ტრაგედია, რომელშიც მწერალმა შეძლო ჩააქსოვა შორეული მომავლის ოპტიმისტური პერსპექტივებიც. ხოლო მოთხრობები "ქვევრი" (1961 - სათაურით "შემოღამება ქვევრში"), "ცხოვრება წინ არი" (1964) და რომანი "ყორნალი" (1967) დღევანდელობის აქტუალურ პრობლემებს ეხება. მასვე ეკუთვნის პიესა "მოგზაურობა სამ დროში" (1961), რომელიც ხელოვნების დანიშნულების თემას აშუქებს, აგრეთვე მრავალი საბავშვო ლექსი და პოემა. თარგმნა მიცკევიჩის, ნერუდას, პეტეფის,  ემინესკუს, ბოტევის, ვაზოვისა და სხვების ლექსები და პოემები. გრ. აბაშიძის ნაწარმოებები თარგმნილია უცხოურ ენებზე.  იგი დასაფლავებულია დიდუბის მწერალთა და საზოგადო მოღვაწეთა პანთეონში