ავტორების სია » ლევან სანიკიძე

ლევან სანიკიძე დაიბადა 1925 წელს რაჭაში, ამბროლაურის რაიონის  სოფელ ბუგეულში. მამა, დავით სანიკიძე, კოლმეურნეობის ბუღალტერი, წარმოშობით გურიიდან იყო. დედა, ნინო გელოვანი, აზნაურული ჩამომავლობისა იყო.

ლევან სანიკიძემ დაამთავრა წულუკიძის სახელობის ქუთაისის პედაგოგიური ინსტიტუტის ისტორიული ფაკულტეტი. იყო ს. ყაუხჩიშვილის ასპირანტი. ომის პერიოდში სამი წელი ჯარში იმსახურა. 28 წლის ასაკში დაიცვა საკანდიდატო დისერტაცია.  1966 წელს დაიცვა სადოქტორო დისერტაცია და მიენიჭა პროფესორის წოდება.

1975 წლიდან თბილისის სახელმწიფო უნივერსიტეტის ძველი მსოფლიოს ისტორიის კათედრის გამგედ მოიწვიეს.

1956 წელს გამოქვეყნდა მისი პირველი პიესა ''გაიუს გრაკხუსი", რომელიც 1957 წელს დაიდგა. ამას გარდა, მას ჰქონდა პიესები ''მედეა", ''სპარტაკი", ''ქუთათურები", რომლებიც დიდი წარმატებით იდგმებოდა ქართული თეატრების სცენებზე.

1976-81 წლებში გამოქვეყნდა ლ. სანიკიძის საქვეყნოდ ცნობილი და აღიარებული მხატვრულ-დოკუმნტური თხზულება ''უქარქაშო ხმლები", რომელმაც რამდენიმე გამოცემას გაუძლო. ლევან სანიკიძის კალამს ეკუთვნის ასევე პოპულარული წიგნები: ''ანტიკური ქვეყნების ისტორია", ''ამბავი კოლხი ასულისა", ''რომის იმპერია", ''მარიუსი და სულა", ''კვერთხი ეშმაკთა", ''კეისარიადა", ''სამას-სამასი", ''ალექსანდრე მაკედონელი", ''გიორგი სააკაძე", ''დედა ისტორია", ''დავით აღმაშენებელი", ''თამარიანი", ''სავედრებელი გიორგი ათონელისა", ''მესამე დასის საქართველო", ''წიგნი მოწამეთა", ''პონტოელნი", ''მკვლელობა ხობის წყლის პირას", ''პუნიკური ომები".

ლევან სანიკიძის შემოქმედებას ეკუთვნის ასევე: პიესები და წერილები.

ლევან სანიკიძე გარდაიცვალა 2001 წლის 29 იანვარს, 77 წლის ასაკში. დაკრძალულია ვერის სასაფლაოზე, ეკლესიის შესასვლელთან.