გამარჯვებული სკოლები დასაჩუქრდნენ

საქართველოს განათლებისა და მეცნიერების მინისტრის მოადგილემ ირინე ქურდაძემ ,,სამოქალაქო აქტიურობის ხელშეწყობის პროგრამის“ ფარგლებში გამართული თეატრალური ფესტივალის გამარჯვებულ სკოლებს პორტატული კომპიუტერები გადასცა. ღონისძიება ილიას სახელმწიფო უნივერსიტეტში შემაჯამებელი კონფერენციის ფარგლებში გაიმართა და მასში სტუდენტები,  მოსწავლეები, მათი მშობლები, საქართველოში მცხოვრები ბოშები, დევნილები და რეპატრირებული მესხები მონაწილეობდნენ.

,,სამოქალაქო აქტიურობის ხელშეწყობის პროგრამას“ საქართველოს განათლებისა და მეცნიერების სამინისტრო  2007 წლიდან წარმატებით ახორციელებს. პროგრამის მიზანი სხვადასხვა სოციალური ფენისა და წარმომავლობის მოზარდების დამეგობრება და მათი  საზოგადოებრივ საქმიანობებში ჩართვაა. დამეგობრება ხდება საჯარო სკოლებში რეგულარული კლუბების ამუშავებით (ხელგარჯილობა, სპორტი, სიმღერა, ცეკვა და ა.შ) და შეთავაზებული ერთობლივი აქტივობებით. ხოლო დამეგობრებული მოზარდების სათემო საქმიანობებში ჩართვა არის ბიძგი მათი  საზოგადოებრივ საქმიანობაში ჩართვისთვის.

პროგრამაში მონაწილეობენ ის საჯარო სკოლები, რომელთა თემში ცხოვრობს არაქართული მოსახლეობა, ბოშები, დევნილები, რეპატრირებული მესხები ან მდებარეობს ბავშვთა სახლები და სპეციალიზირებული პროფილის საჯარო სკოლები. პროგრამაში ასევე მონაწილეობენ ილიას სახელმწიფო უნივერსიტეტისა და ბათუმის შოთა რუსთაველის სახელმწიფო  უნივერსიტეტის სტუდენტები.

კონფერენციის პარალელურად, გაიმართა კონკურსი: ,,ყოველ დღესა შენს თავს ჰკითხო აბა დღეს მე ვის რა ვარგე“. წლის განმავლობაში კლუბებში დამეგობრებული სხვადასხვა სოციალური ფენისა და შესაძლებლობების მოზარდებმა წარმოადგინეს მათ მიერ საჯარო სკოლების თანატოლებთან  ერთად განხორციელებული საქმიანობის ამსახველი ფოტოსტენდები.