პროექტის „ჩემი დედა ენა“ და ანიმაციური 3D პროგრამის პრეზენტაცია გაიმართა

ექსპოზიციაზე წარმოდგენილი იყო იაკობ გოგებაშვილის, აკაკი წერეთლის, სოლომონ ასლანიშვილი-ბავრელის პირადი საარქივო მასალა: „დედა ენის“ შავი ნაწერები, საყმაწვილო ლექსების რვეული, გოგებაშვილის ავტოგრაფი ჩასწორებული აკაკი წერეთლის ხელით, იაკობ გოგებაშვილის წერილები აკაკი წერეთელთან, წერილები, რომლებიც ასახავენ იაკობ გოგებაშვილის ქველმოქმედებას, გაწეულს ქართველი სტუდენტებისათვის (ნოე ჟორდანიას სამადლობელი წერილი მისთვის სწავლის პერიოდში ფულის გაგზავნისათვის), ჩანაწერები თუ როგორ უნდა გავრცელდეს „დედა ენა“ აფხაზეთში, აჭარასა და სამეგრელოში.

გამოფენაზე ასევე წამოდგენილი იყო: ოსკარ შმერლინგის მიერ საგანგებოდ „დედა ენისათვის“ შექმნილი ილუსტრაციების ორიგინალები და პირველნაბეჭდი ''დედა ენის'' სტამბური კლიშეები.

საგამოფენო–საგანმანათლებლო პროგრამა 17 აპრილს დასრულდება და ამ ხნის განმავლობაში, გარდა საარქივო მასალისა, დამთვალიერებლებს საშუალება ექნებათ იხილონ 1629 წელს რომში დაბეჭდილი პირველი ქართული წიგნი “ქართული ანბანი ლოცვებითურთ” და ივანე ჯავახიშვილის პირადი ბიბლიოთეკიდან საბჭოთა ხელისუფლების მიერ რეპრესირებული წიგნი - აფხაზური „დედა ენა“, რომელიც შედგენიალია იაკობ გოგებაშვილის სახელმძღვანელოს მიხედვით.

ღონისძიებაზე ასევე წარმოდგენილი იყო ანიმაციური 3D პროგრამა: „როგორ იქმნებოდა დედა ენა“ - განვითარებულ სამუზეუმო სივრცეში. ისოტირული მემკვიდრეობის წარსადგენად დღეს, სულ უფრო აქტიურად იყენებენ ახალ ტექნოლოგიებს, რათა ძველი უფრო მომხიბლავი და გასაგები გახდეს თანამედროვე თაობისათვის.

გამოფენის ფარგლებში შექმნილი ანიმაცია არის პირველი მცდელობა ქართულ სამუზეუმო სივრცეში ამგვარი პროდუქტის გამოყენებისა.